Zabardasti se Rishte Judte NahinTelly-Tadka

Ayaan ne apne sach se Humaira ka dil toda, uske khwaab ko adhora sa kurdiya. Aur yehi Razia ki kamzori hai uski beti ke aanso. Kabhi maa apne bacho ke aanso ko apni kamzori banati hai aur kabhi yehi aanso apni takhat. Yehi Razia kur rahi hai, uski beti ke aanso uski kamzori bhi hain aur takhat bhi jiska istemaal woh Ayaan pur kur rahi hai. Daikhte hai waqt Razia se kya kya kurwata hai, aur yehi waqt Razia ki qismet mein kya kya laata hai.

Zoya apne bharose, aur khwaab ke tootne ka matam mana rahi hai, aur Asad na hoiee ghalti ka dukh jhel raha hai. Zoya ki aankh naraz hai, pur woh haari nahin hai. Aaj uski aankhon mein woh dukh dikh raha tha jo uska bharosa tootne se hova, pur kahin uski aankh mein woh yakheen tha jiske sahare woh Tanu ka sach Asad ki aankho ke saamne laaygi. Aaj woh Asad se naraz zaror hai, pur jald woh Asad ko sunneygi, samjheygi. Jaisa pehle bhi kaha tha ke yeh ladai bharose ki hai, aur jeet bhi bharose ki hogi.

Asad ko kuch yaad nahin, aur iska faida Tanu ne uthaya apni mann gharat kahani sunna kur. Asad ko uski nazron mein hi gira diya, chota kur diya, pur kya waqi woh yeh kur paayi hai? Nahin itna aasan nahin hota hai kisi pur se uska bharosa uthana. Kuch pal ke liye toh mumkin hota hai, pur zyada dair ke liye nahin, aur ek baar aapko aap ka bharosa mil jaaye toh saamne wale ki khair nahin hoti. Tanu bhi apni bure waqt ka intezaar kur rahi hai, jo jald hi aayega.

Dilshaad Asad se bohut naraz hai, jaisa pehle kaha tha ke Dilshaad Asad ko ghalat nahin maanti hai, pur khafa hai. Aur yehi wajjah hai ke woh usse Zoya se baat nahin kurne deyna chahti, pur Asad sahi hai, aur usse Zoya se baat kurna zarori hai, jo woh kareyga, chahey Tanu kitni bhi jhooti kahani sunaye, chahey Dilshaad usse roke.

Zoya chali gaiee uss ghar se, kyonke pehle jab woh aaiee thi toh woh ek mehmaan aaiee thi jisse Asad ne khushi se qubool nahin kiya tha. Aur jab aap kisi ke ghar uski marzi ki qilaaf aate hain toh shayad woh izzat nahin milti hai. Aaj Zoya sab chor kur chali gaiee, kuch saath nahin le gaiee, sirf Asad ki yaadein. Abb Asad usse apne ghar mein ussi izzat ke saath laayega, jo izzat usse milni chahiye. Jab tak loog aap ko khudh izzat aur pyaar na dein, unki zindagi mein zabardasti rehne ki zarorat hi nahin hai.

Aapi ne sahi kaha unhein hamesha dar tha ke koi ajnabi unki Zoya ko dukh na de. Woh hamesha se Zoya ko bachati aaiee thi, aur bachana chahti thi. Kabhi kabhi humare dar hi ki wajjah se humein aise halat ka saamna kurna padhta hai. Humara khudh ka dar hi hamare saamne aa khada hota hai, aur yehi aapi ke saath hova. Jiyo dar ke baghair, kyonke aksar humara dar hi hamein le doobta hai. Asad ka dar tha ke woh Raashid ki jagah na khada ho, toh uske saath wohi hova. Aapi ka dar tha ke Zoya ko kabhi koi takleef na ho, uske saath bhi wohi hova. Razia ka dar uski beti ke aanso hain, aur wohi Humaira ko mil rahe hain. Shereen ka dar Nikhat ka nikkah hai, aur Nikhat ussi dard se guzar rahi hai. Uski shaadi ek mazakh ban gaiee hai. Humare apne dar hi hamari kamzori hain, humari zindagi ki rukawat hai.

Asad ne wada kiya hai woh Zoya ko dhoond kur laayega toh woh zaror laayega. Tanu kitna bhi jashan mana le apni kamyaabi pur, pur hare loog aksar aise hi khush hote hain, jab unka anjaam bura hone wala hota hai. Hur ghalat ka anjaam bura hi hota hai, warna sachai ka koi naam-o-nishan na hota.

"Khisyani Bili khamba noche" aisi hi halat Tanu ki hogaiee thi jab Dilshaad ki nazar uss pur padi. Dilshaad ne bilkul sahi kaha, ek aadmi ki ghalti se badi ek aurat ki ghalti hoti hai, uss ki zimmedari zyada hoti hai apne aap ko bachane ki. Aur Tanu apne lutne ka jitna dukh dikha rahi hai. Dilshaad ne usse uski jagah dikha di. Usse pata hai ke kabhi ghalti ek ki hoti hi nahin hai. Asad ki bas itni hi ghalti hai ke woh kamzoor tha, dost ki dosti nibhata raha yeh jaane bina ke dost ki niyat hi kharab hai. Asad se ghalti hui yeh dukh, sharmindagi uss kea ankh mein dikhti hai, jo ke uss ne ki bhi nahin. Aur Tanu jis be'sharmi se ghoom rahi hai, khadi hai, yeh baat saaf pata chalti hai ke woh ghalat hai, aur sab kuch uska hi kiya dhara hai. Dilshaad ne usse saaf lafzon mein nahin pur jaane ka ishara de diya. Agar Asad ghalat hai toh Tanu ko yahan nahin hona chahiye kyonke izzat wali ladkiyan aise khadi nahin rehti. Bohut khoob Dilshaad ke aap ne Tanu ko darwaza dikhaya. Woh be'ghairat hai, itni asaani se nahin jaayegi. Izaat waale loog asani se be'ghairat logon se nahin jeette hain. Thora aur waqt intezaar kijiye aap ka beta khudh maar kur bahar nikalega. Be'ghairat sirf joote ki zuban samajhte hain.

Tanu zabardasti ka rishta banana aaiee hai, jo sirf rishton ko bikhairta hai, jaise uss ne abhi sab ko bikhair diya hai, pur zyada din nahin, kyonke aandhi bikhair sakti hai pur tood nahin.

Aise bohut se toofan ka saamne kurne ke liye daikhte rahiye Qubool Hai Monday se Friday hur raat 9:30 bajje Zee TV pur.

Author – Muniza Riaz

Telly Tadka