Shayri ( My Collection) - Page 46

Ashk Ankhon Main Chupatay Hue Thak Jata Hoon
Bojh Pani Ka Uthatay Hue Thak Jata Hoon
Paanv Rakhtay Hain Jo Mujh Par Unhay Ehsaas Nahi
Main Nishanaat Mitatay Hue Thak Jata Hoon
Barf Aisi Ke Pighalti Nahi Paani Ban Kar
Pyaas Aisi Ke Bujhatay Hue Thak Jata Hoon
Acchi Lagti Nahi Is Darja Shanasayi Bhi
Hath Hathon Se Milatay Hue Thak Jata Hoon
Gham Gusaari Bhi Ajab Kaar-E-Mohabbat Hai Ke Main
Ronay Walon Ko Hansatay Hue Thak Jata Hoon
Itni Qabrein Na Banao Meray Andar 'Mohsin'
Main Chraghon Ko Jalatay Hue Thak Jata Hoon...!!!

Todna Tootay Hue Dil Ka Bura Hota Hai
Jiska Koi Nahi, Uska To Khuda Hota Hai
Mang Kar Tumsay Khushi Loon, Mujhay Manzoor Nahi
Kis Ka Maangi Hui Daulat Se Bhala Hota Hai
Log Nahaq Kisi Majboor Ko Kehtay Hain Bura
Aadmi Acchay Hain, Par Waqt Bura Hota Hai
Kyun 'Muneer' Apni Tabaahi Ka Ye Kaisa Shikwa
Jitna Taqdeer Main Likha Hai Ada Hota Hai...!!!

Kon Kehta Hai Tujhay Mainay Bhula Rakkha Hai
Teri Yaadon Ko Kalejay Se Laga Rakkha Hai
Lab Pe Aahen Bhi Nahi Aankh Main Ansoo Bhi Nahi
Dil Ne Har Raaz Mohabbat Ka Chupa Rakkha Hai
Tu Ne Jo Dil Ke Andheron Main Jalaya Tha Kabhi
Wo Diya Aaj Bhi Seenay Main Jala Rakkha Hai
Dekh Jaa Aa Ke Mehektay Hue Zakhmon Ki Bahaar
Mainay Ab Tak Teray Gulshan Ko Saja Rakkha Hai...!!!

Ek Khwab Hai Is Khwab Ko Khona Bhi Nahi Hai
Tabeer Ke Dhaagay Main Pirona Bhi Nahi Hai
Lipta Hai Dil Se Kisi Raaz Ki Soorat
Wo Shakhs Ke Jisko Mera Hona Bhi Nahi Hai
Ye Ishq-O-Mohabbat Ki Riwayat Bhi Ajab Hai
Paya Nahi Jis Ko Usay Khona Bhi Nahi Hai
Kis Shakhs Ki Khaatir Ye Tera Haal Hua Hai
Usnay Teray Mar Janay Pe Rona Bhi Nahi Hai...!!!

Ek Mohabbat Hai Aur Uski Ek Nishani Hai
Ek Dil Hai Jaisay Koi Haweli Purani Hai
Safar Raat Ka Hai Aur Raat Bhi Toofani Hai
Samandar Hi Samandar Hai Kashti Bhi Doob Jani Hai
Ibteda-E-Ishq Se Inteha-E-Ishq Tak
Main Hi Tha Bewafa Aur Mainay Hi Wafa Nibhani Hai
Main Laut Aya Hoon Manzil Ko Dekh Kar
Yahan To Yaadon Ki Veerani Hi Veerani Hai
Ye Intezar Khatam Kyun Nahi Hota Kis Se Poochon
Kya Koi Manzil Mera Muqaddar Hai
Ya Meri Adhoori Kahani Hai...!!!

Kabhi Mom Ban Ke Pighal Gaya, Kabhi Girtay Girtay Sambhal Gaya
Usay Rokta Bhi To Kis Tarha, Ke Wo Shakhs Itna Ajeeb Tha
Kabhi Tadap Utha Meri Aah Se, Kabhi Ashk Se Na Pighal Saka
Sar-E-Raah Mila Wo Agar Kabhi To Nazar Chura Ke Guzar Gaya
Wo Utar Gaya Meri Aankh Se, Meray Dil Se Kyun Na Utar Saka
Wo Chala Gaya Jahan Chor Ke, Main Wahan Se Phir Na Palat Saka
Wo To Sambhal Gaya Mujhay Chor Ke
Main Bikhar Ke Phir Na Simat Saka...!!!

Tumnay Poocha Hai Chalo Tumko Bata Detay Hain
Jo Hum Pe Guzri Hai Tum Ko Bhi Suna Detay Hain
Teray Baad Hamein Khud Pe Bhi Aitbaar Nahi
Lafz Likhtay Hain Likh Kar Mita Detay Hain
Nami Ankhon Main Liye Logon Se Kabhi Hans Lein
To Aisa Lagta Hai Ke Khud Ko Saza Detay Hain
Teri Yaad Se Ek Pal Bhi Ghafil Na Rahay
Yunhi Dil Ke Behal Janay Ko Bhula Detay Hain
Hamnay Hans Ke Teray Saath Guzaray Thay Kabhi
Yaad Atay Hain Jo Wo Pal To Rula Detay Hain...!!!

Udaas Tehreer Parh Ke Meri, Meray Sanam Muskura Na Dena
Ye Aakhri Khat Main Likh Raha Hoon, Khayal Karna Jala Na Dena
Guzar Rahi Hai Tumhari Kaisi, Bichar Ke Hamsay Rula Ke Humko
Haqeeqaton Ko Zaroor Likhna, Ana Ki Khatir Chupa Na Lena
Koi Jo Poochay Kidhar Gaya Wo, Jo Teri Mehfil Ka Tha Sahara
Jo Furqaton Ka Sabab Banay Hain, Kisi Bashar Ko Bata Na Dena
Main Mar Bhi Jaoon To Muskurana, Ehsaas-E-Gham Ki Na Chhot Khana
Jo Qurb-E-Gham Se Nigaahein Bheegein, To Rukh Se Aanchal Hata Na Dena
Lahu Se Tehreer Kar Raha Hoon, Main Apni Sari Kahani 'Mohsin'
Jo Phaad Bhi Do To Paas Rakhna, Hawa Main Tukray Urra Na Dena...!!!

Wo Dil Hi Kya Teray Milnay Ki Jo Dua Na Karay
Main Tujhko Bhool Kar Zinda Rahoon Khuda Na Karay
Rahega Pyaar Tera Saath Zindagi Ban Kar
Ye Aur Baat Hai Ke Meri Zindagi Wafa Na Karay
Ye Theek Hai Ke Nahi Marta Koi Judayi Main
Khuda Kisi Ko Kisi Se Magar Juda Na Karay
Agar Wafa Par Bharosa Na Rahay Duniya Main
To Koi Shakhs Mohabbat Ka Honsla Na Karay
Suna Hai Usko Mohabbat Duayein Deti Hai
Jo Dil Par Chhot To Khaye Magar Gila Na Karay
Bujha Diya Hai Naseebon Ne Meray Pyaar Ka Chand
Koi Diya Meri Palkon Pe Ab Jala Na Karay
Zamana Dekh Chuka Hai, Parakh Chuka Hai Usay
'Qateel' Jaan Se Jaaye Magar Ilteja Na Karay...!!!

Wo Ek Yaad, Ke Jo Har Lamha Zehen Main Jaagi
Wo Ek Zikr Ke Lehjay Bhi Hum Badal Na Sakay
Wo Ek Naam Ke Jis Naam Ko Na Bhoolay Kabhi
Wo Ek Raah Ke Jis Raah Se Kabhi Nikal Na Sakay
Wo Ek Zakhm Ke Har Lamha Taaza Taaza Raha
Wo Ek Dard Ke Jis Se Kabhi Sambhal Na Sakay
Wo Ek Shakhs Ke Har Raah Main Jisay Dhoonda
Jo Saath Saath Kabhi Do Qadam Bhi Chal Na Sakay
Ye Sochta Hoon Nazar Uski Kya Karoon Mai
Ke Jaan Bhi Doon To Mera Honsla Nikal Na Sakay...!!!