Shayri ( My Collection) - Page 45

Is Zamanay Se Na Hum Koi Gila Rakkheingay
Dil Lagayengay To Na Shart-E-Wafa Rakkheingay
Na Dikhayeingay Kabhi Dil Pe Lagay Zakhm Unhay
Dard Utthega Magar Dil Ko Daba Rakkheingay
Jaan De Dengay Agar Ek Ishara Kar De Wo Humko
Hum Usay Apnay Liye Bhi Na Bacha Rakkheingay
Sab Hata Deingay Teri Raah Ki Rukawat Humdum
Ghar Ke Darwazay Ko Har Waqt Khula Rakkheingay
Unki Har Baat Ko Bhoolay Se Na Bhoolengay Kabhi
Unki Yaadon Ko Bhi Seenay Se Laga Rakkheingay
Toot Bhi Jayegi Jo Ummeed Teray Anay Ki
Ek Diya Phir Bhi Hawaon Main Jala Rakkheingay...!!!

Na Tujhay Chor Saktay Hain Teray Ho Bhi Nahi Saktay
Ye Kaisi Bebasi Hai Aaj Hum Ro Bhi Nahi Saktay
Ye Kaisa Dard Hai Pal Pal Hamein Tarpaye Rakhta Hai
Tumhari Yaad Ati Hai To Phir So Bhi Nahi Saktay
Chupa Saktay Hain Aur Na Dikha Saktay Hain Logon Ko
Kuch Aisay Daagh Hain Dil Par Jo Hum Dho Bhi Nahi Saktay
Kaha To Tha Chor Dengay Ye Nagar Phir Ruk Gaye Lekin
Tumhein Paa To Nahi Saktay Magar Kho Bhi Nahi Saktay
Hamara Ek Hona Bhi Nahi Mumkin Raha Ab To
Jiyein Kaisay Ke Tumsay Door Hum Reh Bhi Nahi Saktay...!!!

Samay Ke Saath Gar Hum Bhi Badal Jatay To Accha Tha
Bahut Armaan Thay Dil Main Nikal Jatay To Accha Tha
Na Sheeshay Ke Hi Reh Paye Na Patthar Ke Hi Ho Paye
Kisi Acchay Se Saanchay Main Jo Dhal Jatay To Accha Tha
Giray To Yun Giray Pee Kar Giraya Sabnay Nazron Se
Zara Sa Larkhara Kar Hi Sambhal Jatay To Accha Tha
Wo Hamsay Aisay Roothay Hain Ke Hum Andar Se Tootay Hain
Kisi Bacchay Ki Manind Hi Machal Jatay To Accha Tha
Safar Main Ho Koi Saathi To Asaani Si Rehti Hai
Akelaypan Ke Zaalim Pal Jo Tal Jatay To Accha Tha...!!!

Jab Bhi Qareeb Ata Hoon Batanay Ke Liye
Zindagi Door Rakhti Hai Satanay Ke Liye
Mehfilon Ki Shaan Na Samjhna Tum Mujhay
Main To Hansta Hoon Gham Ko Chupanay Ke Liye
In Faslon Ko Na Samjho Tum Meri Bewafayi
Main Door Hoon Tumsay, Paas Anay Ke Liye
Mat Jano Haqeeqat Meray In Ansuon Ko
Main To Rota Hoon Faqat Tumko Rulanay Ke Liye
Koi Gila Nahi Hai Mujhay Apni Barbaadi Ka
Mai To Khelta Hoon Aag Se Jal Janay Ke Liye
Ab Duniya Kuch Bhi Samjhay, Mujhay Parwaah Nahi
Main To Jeeta Tha Zindagi, Mar Janay Ke Liye...!!!

Wo Hain Paas Aur Yaad Anay Lagay Hain
Mohabbat Ke Hosh Ab Thikanay Lagay Hain
Sun Hai Hamein Wo Bhulanay Lagay Hain
To Kya Hum Unhay Yaad Anay Lagay Hain
Hataye Thay Jo Raah Se Dosto Ki
Wo Patthar Meray Ghar Main Anay Lagay Hain
Wo Phir Mujhay Yaad Anay Lagay Hain
Jinhay Bhoolnay Main Zamanay Lagay Hain
Ye Kehna Tha Unsay Mohabbat Hai Mujhko
Ye Kehnay Main Mujhko Zamanay Lagay Hain
Qayamat Yaqeenan Qareeb Agayi Hai
'Khumaar' Ab To Masjid Main Janay Lagay Hain...!!!

Ajnabi Hai To Meray Zehen Main Rehta Kyun Hai
Wo Patthar Hai To Sheeshon Ka Maseeha Kyun Hai
Wo Hawa Hai To Guzray Wo Hawaon Ki Tarha
Wo Samandar Hai To Thehra Rahay Behta Kyun Hai
Meray Aangan Main Nahi Koi Ummeedon Ka Gulaab
Phir Ye Mausam Meray Angan Main Utarta Kyun Hai
Jiskay Chehray Pe Saji Jhoot Ki Tehreerein Hain
Dil Usi Shakhs Ke Waadon Se Behelta Kyun Hai
Ye Mera Dil Ye Mausam Ye Anjaan Sa Dil
Phir Na Janay Teray Naam Se Dharakta Kyun Hai...!!!

Rog Aisay Bhi Gham-E-Yaar Se Lag Jatay Hain
Dar Se Uthtay Hain To Deewar Se Lag Jatay Hain
Ishq Aaghaz Main Halki Si Khalish Rakhta Hai
Baad Main Senkron Aazar Se Lag Jatay Hain
Pehlay Pehlay Hawas Ki Ik Aadh Dukaan Khulti Hai
Phir To Bazaar Ke Bazaar Se Lag Jatay Hain
Bebasi Bhi Kabhi Furqat Ka Sabab Banti Hai
Ro Na Payein To Galay Yaar Se Lag Jatay Hain
Daagh Daman Ke Hon, Dil Ke Hon, Ya Chehray Ke 'Faraz'
Kuch Nishan Umr Ki Raftaar Se Lag Jatay Hain...!!!

Teray Khayal Main Kuch Aisay Gum Raha Barson
Main Apnay Apsay Bhi Mil Nahi Saka Barson
Kaheen Wo Zaiqa Tehleel Hi Na Ho Jaye
Main Tumsay Mil Kar Kisi Se Nahi Mila Barson
Kaha Tha Tumnay Ke Tum Laut Ke Aaogay Ek Din
So Main Jahan Tha Waheen Par Khara Raha Barson
Teray Baghair Meri Umr Rayegaan Guzri
Koi Bhi Kaam Nahi Theek Se Hua Barson
Tumharay Haath Ki Dastak Ki Aas Main 'Mohsin'
Main Apnay Ghar Se Kaheen Bhi Nahi Gaya Barson...!!!

Kisi Ki Ankh Pur Nam Hai, Mohabbat Ho Gayi Hogi
Zabaan Pe Qissa-e-Ghum Hai, Mohabbat Ho Gayi Hogi
Kabhi Hasna Kabhi Rona, Kabhi Hans Hans Ke Ro Dena
Ajab Dil Ka Yeh Alam Hai, Mohabbat Ho Gayi Hogi
Kabhi Aankhon Hi Aankhon Me Wo Baaton Ka Bata Dena
Kabhi Takraar Baham Hai, Mohabbat Ho Gayi Hogi
Kisi Ko Samney Paa Kar Kisi Ke Surkh Honton Par
Anookha Saa Tabassum Hai, Mohabbat Ho Gayi Hogi
Har Ik Salvat Pe Bistar Ki Kisi Ka Naam Likha Hai
Diye Ki Lo Bhi Madham Hai, Mohabbat Ho Gayi Hogi...!!!

Guzray Hue Taveel Zamanay Ke Baad Bhi
Dil Main Raha Wo Chor Ke Janay Ke Baad Bhi
Pehlu Mai Reh Ke Dil Ne Diya Hai Bahut Faraib
Rakkha Hai Usko Yaad Bhulanay Ke Baad Bhi
Qurbat Ke Baad Aur Bhi Qurbat Ki Hai Talaash
Dil Mutmaen Nahi Hai Teray Anay Ke Baad Bhi
Goo Tu Yahan Nahi Hai Magar Tu Yaheen Pe Hai
Tera Hi Zikr Hai Teray Janay Ke Baad Bhi
Lagta Hai Kuch Kaha Hi Nahi Hai Usay 'Faraz'
Dil Ka Tamaam Haal Sunanay Ke Baad Bhi...!!!